വായനാനുഭവം - നനയുവാൻ ഞാൻ കടലാകുന്നു - നിമ്ന വിജയ് (Book Review - Nanayuvan Njan Kadalaakunnu by Nimna Vijay)

വായനാനുഭവം - നനയുവാൻ ഞാൻ കടലാകുന്നു - നിമ്ന വിജയ്  

ഏറ്റവും പ്രിയപ്പെട്ട എന്നോട് എന്ന ബ്ലോക്ക് ബസ്റ്റർ നോവലിന്റെ രചയിതാവായ ശ്രീമതി നിമ്ന വിജയ് ന്റെ അടുത്ത പുസ്തകം ആണ് "നനയുവാൻ ഞാൻ കടലാകുന്നു". ആദ്യ പുസ്തകത്തോട് ഒട്ടും മമത തോന്നാതിരുന്നതിനാൽ ഈ പുസ്തകത്തിന്റെ പുറത്ത് എഴുതിയിരുന്ന ആ 'ഫ്രം ദി ഓതർ ഓഫ്' എന്ന ലേബലാണ് സത്യത്തിൽ ഇതുവരെ എന്നെ ആ വായനയിൽ നിന്നും പിൻവലിച്ചു നിർത്തിയിരുന്നത്. യാദൃശ്ചികമായാണ് എനിക്ക് ആ പുസ്തകം വായനയ്ക്കായി ലഭിക്കുന്നത്. ഏറ്റവും പ്രിയപ്പെട്ട എന്നോട് പോലെ സ്ത്രീ കേന്ദ്രീകൃതമായ, പുരുഷന്മാർ ഒന്നടങ്കം ശത്രുപക്ഷത്ത് അണിനിരക്കുന്ന ഒരു നോവൽ പ്രതീക്ഷിച്ച് പുസ്തകം തുറന്ന ഞാൻ അക്ഷരാർത്ഥത്തിൽ ഞെട്ടിപ്പോയെന്ന് പറയാം. ഫെമിനിസ്റ്റ് ആയ ഒരു മോഡേൺ എഴുത്തുകാരി എന്നതിൽ നിന്നും അനുജത്തിയോട് തോന്നുന്നത് പോലൊരു വാത്സല്യത്തോടെയാണ് ആ വായന എനിക്ക് അവസാനിപ്പിക്കേണ്ടി വന്നത്. ആർദ്രമായ ഒരു പറ്റം ഓർമ്മക്കുറിപ്പുകളാണ് ഈ പുസ്തകത്തിന്റെ ഇതിവൃത്തം.

നിമ്ന വിജയ് ആരായിരുന്നു എന്നതിനൊപ്പം തൊണ്ണൂറുകളിൽ ജനിച്ച ഒരു മലയാളി പെൺകുട്ടിയുടെ ചിന്തകളും ജീവിതവും അടുത്തറിയുവാൻ നമുക്ക് ഈ അനുഭവക്കുറിപ്പുകളിലൂടെ സാധിക്കും. ജോസഫ് അന്നംക്കുട്ടി ജോസ് ന്റെ ദൈവത്തിന്റെ ചാരന്മാരുമായി ഒരു സാദൃശ്യം എനിക്ക് തോന്നി. അതിൽ അന്നംക്കുട്ടി ജോസ് ന്റെ അനുഭവങ്ങൾ വിവരിക്കുന്നു, ഇതിൽ നിമ്നയുടെയും. രണ്ടും തികച്ചും വ്യത്യസ്തമായ ജീവിതപശ്ചാത്തലം ആയതിനാൽ സാദൃശ്യം ആദ്യം പറഞ്ഞത് മാത്രമേയുള്ളൂ. രണ്ടും വായിക്കാൻ ഹൃദ്യവും മനസിനെ ആർദ്രമാക്കുന്നതുമാണ്. ആമുഖമായി നിമ്ന പറയുന്നത് പൂർണ്ണമായും സത്യമാണ്. എഴുതി തീർത്ത വരികൾക്കിടയിലൂടെ കടന്നുപോകുമ്പോൾ നിങ്ങൾക്ക് പലപ്പോഴും നിങ്ങളെ കണ്ടുമുട്ടിയേക്കാം. 

മാൻ കൈൻഡ് പബ്ലിക്കേഷൻസ് 2023 ൽ പുറത്തിറക്കിയ നോവലിന്റെ 2024 ൽ ഇറങ്ങിയ പത്തൊൻപതാമത്തെ പതിപ്പായിരുന്നു ഞാൻ വായിച്ചത്. അതിൽ നിന്നും തന്നെ നിമ്നയുടെ പുസ്തകങ്ങളുടെ സ്വീകാര്യത അനുമാനിക്കാവുന്നതാണ്. 168 പേജുകളുള്ള പുസ്തകത്തിന്റെ വില 299 രൂപ.