മലയാളത്തിൽ വായിച്ചതിൽ വെച്ച് വ്യത്യസ്തമായ ഒരു പ്രമേയത്തെ മുൻനിർത്തി ശ്രീമതി മായാ കിരൺ എഴുതിയ നോവലാണ് പ്ലാനറ്റ് 9. അന്യഗ്രഹജീവികൾ കഥാപാത്രമായി വരുന്ന സ്പേസ് ഫിക്ഷൻ എന്ന വിഭാഗത്തിൽ ഉൾപ്പെടുത്താവുന്ന നോവലാണിത്. ശരിക്കും ഒരു ഹോളിവുഡ് സിനിമ ആസ്വദിക്കുന്നതുപോലെ ആസ്വാദനീയമായി നോവൽ ഒരുക്കിയ ശ്രീമതി മായാ കിരണിന് ഹൃദ്യമായ അഭിനന്ദനങ്ങൾ.
സയൻസ് ഫിക്ഷൻ വിഭാഗത്തിലെ പുസ്തകങ്ങൾ ആവശ്യപ്പെടുന്നതുപോലെ മനസ്സിരുത്തിയുള്ള ഒരു വായന ആവശ്യപ്പെടുന്നൊരു പുസ്തകമാണ് പ്ലാനറ്റ് 9. ഫിക്ഷനോ യാഥാർഥ്യമോ എന്ന് സംശയം ജനിപ്പിക്കുന്ന ഒട്ടേറെ മുഹൂർത്തങ്ങളും, സംഭവ്യം എന്ന് തോന്നിപ്പിക്കുന്ന ഒട്ടനവധി സംഭവങ്ങളും കഥയിലുടനീളം കാണാം.
കഥയിലേക്ക് ഒന്നെത്തിനോക്കിയാൽ ഭൂമി നേരിടാൻ പോകുന്ന ഒരു ആപത്ത്, മനുഷ്യരാശിയെത്തന്നെ തുടച്ചുനീക്കിയേക്കാവുന്ന ഒരു അന്യഗ്രഹ ജീവിയുടെ ആക്രമണം തിരിച്ചറിയപ്പെടുന്നതും അതിൽ നിന്ന് ലോകം രക്ഷപ്പെടുന്നതുമാണ് നോവലിലെ പ്രതിപാദ്യം. സംഭവങ്ങളെ എൺപത് ശതമാനവും സംഭാഷണങ്ങളിലൂടെയാണ് വിവരിക്കുന്നത്. അതും നാസ. ഇസ്രോ, സ്പേസ് എക്‌സ് തുടങ്ങിയ ബഹിരാകാശ ഗവേഷണരംഗത്തെ ഭീമന്മാരിലെ കൂടിയ തലകൾ തമ്മിലുള്ള സംഭാഷണം. പുസ്തകം വായിക്കുന്ന ഏതൊരാൾക്കും അതിശയോക്തി കൂടാതെ അവരുടെ മീറ്റിങ്ങുകൾ വായിച്ചെടുക്കാം, അവർ പറയുന്ന കാര്യങ്ങൾ മനസിലാക്കാം (എന്തായാലും എനിക്ക് മനസിലായി) എന്നത് എഴുത്തുകാരിയുടെ വിജയമാണ്. ഇനിയും യോഗി കഥയ്ക്ക് തുടർക്കഥകൾ ഉണ്ടായേക്കാം എന്ന രീതിയിലാണ് കഥ അവസാനിപ്പിക്കുന്നത്. ഇതുപോലൊരു വിഷയം ഇന്റർനെറ്റും ലോകസിനിമകളും കൈക്കുമ്പിളിലിട്ട് അമ്മാനമാടുന്ന മലയാളി വായനക്കാർക്ക് മുന്നിൽ സധൈര്യം അവതരിപ്പിച്ച എഴുത്തുകാരിക്ക് ബിഗ് സല്യൂട്ട്. എവിടെയെങ്കിലും അൽപ്പം പാളിപ്പോയിരുന്നെങ്കിൽ വൻ ഫ്ലോപ്പ് ആയിപ്പോകുമായിരുന്ന ടോപ്പിക്കിനായി അവർ നടത്തിയിട്ടുള്ള അണിയറപ്രവർത്തനങ്ങൾ ഊഹിക്കാവുന്നതിനുമപ്പുറമാണ്.
നെഗറ്റീവ് ആയി തോന്നിയത് മലയാളത്തിൽ ഈ കാറ്റഗറിയിൽ പുസ്തകങ്ങൾ കണ്ടിട്ടില്ലെങ്കിലും ഇതുപോലെയുള്ള തീമുകൾ ധാരാളം ഹോളിവുഡ് സിനിമകളിൽ കണ്ടിട്ടുള്ളതായി തോന്നി. ഏറെക്കുറെ എല്ലാ സമസ്യകൾക്കും ഉത്തരം നൽകുന്നുണ്ടെങ്കിലും എന്തോ എവിടെയോ വിട്ടുപോയപോലൊരു തോന്നൽ അവസാനം എന്നിലവശേഷിച്ചു. ഒരുപക്ഷെ അത് എൻറെ വായനയുടെ കുഴപ്പമാകാം.
വ്യത്യസ്തമായ വായനക്കായി സധൈര്യം സമീപിക്കാവുന്ന നോവലാണ് പ്ലാനറ്റ് 9
No comments:
Post a Comment